طفي النور يا بهية .. احنا عايشين مع ........... ! (( مقال لهيثم نبيل من موقع يالا كوره ))

لم أكره في حياتي قولاً مثلما كرهت جملة : "أصل الأندية ديه بتاعت الحكومة والحكومة
بتصرف عليها" .

وزاد كرهي لهذه العبارة بعد "مهزلة" المادة 18 وحكاية (حسن
فريد) الذي أقام الدنيا ولم يقعدها .. والذي جاء بعد ذلك في "قعدة عرب وشوية شاي
بالياسمين" ليقول: كله تمام يا باشا واحنا زي الفل وما فيش حاجة اسمها مادة 18
أساساً وأنا كنت بهزر !!

من يسمع حسن فريد وهو يتكلم قبل "قعدة الشاي
بالياسمين" يتخيل أن الأمل لا يزال موجوداً في مصر .. ولكن من يسمع كيف تم حل هذه
المشكلة يعرف أنه "زود عيار التفاؤل حبتين" وأن عليه أن ينسى تماماً "حكاية الأمل"
في البلد، لأنه مثلما قال صوت مصر محمد منير وهو يخاطب بهية (وبهية في الثقافة
العامية تشير إلى مصر) قائلاً: طفي النور يا بهية كل الـ .... ولا داعي للمزيد!


السيد الاستاذ حسن فريد كان يقول إن "المسألة مسألة مبدأ " وأنه موكل من
قِبَل 22 نادياً "علشان يرفع صوت الحق" ضد ما وصفه "بالتسيب الرهيب في اتحاد الكرة"
.

وبعد الشاي بالياسمين ... قالك إيه بقى الأستاذ فريد .. قالك "احنا
هانحصل على مساعدة، والأندية الشعبية اللي هي بتاعت الحكومة الحكومة حتدعمها بشكل
كبير" .. وسمعني سلام .. تعيش الحكومة !

والسؤال الأهم .. هي الحكومة
بتاعتنا فاضية يعني ؟ ما فيش حاجة شغلاها ؟ والفلوس الكتير اللي معاها ومش عارفة
توديها فين خلاص بقت كلها موجهة لدعم الكورة ؟ ثم السؤال الأهم: هو فيه حد في
الدنيا بيلعب كورة محترمة يقول إن الأندية بتاعة الحكومة ... مع الاعتراف بالنشيد
الوطني .. تعيش الحكومة !

والسؤال الأهم لمسئولي اتحاد الكرة .. طالما أنتم
عارفين إن الموضوع بجد .. وإن انتم موقفكم مش سليم .. ليه ما عملناش "قعدة الشاي
بالياسمين" بدري شوية بدل اللف والدوران بل ما تشغلونا بكلام فارغ زي ده ؟؟ مهو كده
كده الشاي بالياسمين حيتشرب .. ايه لازمته بقى نأخره !

والشئ المهم أيضا في
"حديث الصباح والمساء" عن المادة 18 وما يترتب عليها أن الفيفا بعد تدخل بعض مسئولي
اتحاد الكرة قالوا لحسن فريد "روح أقعد مع اتحاد الكرة في بلدك وحلوا المشكلة وما
تكبروش الموضوع"

حضرتك يا أستاذ حسن ما حدش قعد معاك، وقالولك أشرب من أقرب
بحر .. فالعملية كبرت في دماغك ورحت مقدم فيهم شكوى في المحكمة الرياضية، والمحكمة
الرياضية قالت احنا موافقين على كلامك وحنحكم فيه .. فاتحاد الكرة عرف إن الموضوع
دخل في الجد .. راح قايل للحكومة وبعض أنصارها " والنبي شوفوا الموضوع ده علشان
شكلنا كده حنروح في داهية " راحت الحكومة وبعض المسئولين فيها قالوا لحسن فريد " قف
مكانك ... قف مكانك " روحت سيادتك وقفت وطلبت شاي بالياسمين وجالك الشاي بالياسمين
... إحنا مالنا بقى ومال الكلام الفاضي ده كله ؟؟

ثم فين الـ22 نادي اللي
كانوا مع سيادتك ولا هما كمان ناويين يشربوا شاي بالياسمين.. احنا كده حنلاقي أزمة
في الشاي بالياسمين في مصر يا جدعان وأنا مش مسئول عن الموضوع ده !!

سيادة
الرئيس حسني مبارك: أرجو منك أن تتخذ قراراً جريئاً بأن تقول للحكومة " مالكيش دعوة
بالكورة " لا تصرفي على نادي ولا تصرفي على فريق ... وخليكي في مهمة نشر الرياضة
بشكل عام في مراكز الشباب والمدارس والجامعات" ... بمعنى آخر ممكن حضرتك تقول
للحكومة .. شوفي شغلك يا حكومة وما لكيش في الكورة علشان ديه مش لعبتك .


وسؤال أخير لاتحاد الكرة .. كلموني شوية عن عدد ممارسي كرة القدم في مصر ..
وكلموني عن خطتكم لأربع سنوات قادمة للنهوض بالكرة المصرية بعيداً عن الحكومة ..
وكلموني عن ما هية منظومة العمل لديكم وكيف يتم تطويرها

ولا أقولكم ..
هاتولي واحد شاي بالياسمين علشان انا محتاج أشتري شقة !!!

تصبحي على خير يا
مصر !

يارب يا امير