اخطر مشكله حصلت فى المنتدى

الكلام اللى هقوله ده انا والله العظيم صادق فيه بس حاسس ان فيه ناس كتير مش هتصدقنى
انا بفتح ايميلى الهوت ميل الصبح لاقيت واصلنى رسالتين من المنتدى قولت ادخل اشوفهم لما دخلت فوجئت ان فيه منهم رساله اتقرت قبل ما افتحها معنى كده ان حد دخل بإشتراكى بس ما جاش فى دماغى المهم بفتح الرساله التانيه لاقيت الكلام ده رساله من دودو
ياااااااااااااااااااااااااه
بصراحه انا اللى لسانى معتش هيخاطب لسانك ابدا
واوعدك انى مش هكلمك تانى
وكمان انا كمان لو حتى فى يوم من الايام كلمتنى حتى غلط
مش هرود عليك

فكرت انها زعلانه منى علشان مش بدخل المنتدى بقالى فتره ومش بسأل فبعتلها رسالة اعتذار بس بعدها فوجئت ان رساله مبعوته من اشتراكى الساعه 3 و 38 دقيقه قبل الفجر والرساله دى بتقول
لو سمحتى انتى بالذات ملكشى دعوه بيه
ولو كلمتنى على الاميل بعد كده هعملك اجنور
فلو عندك كرامه مش تكلمينى تانى لانك بجد انسانه مش تستحقى ان حد ياتكلم معاكى
لانك بتكلمى كل واحد زى ما انتى عايزه انا مش محتاج انى اكلمك
بس بكلمك كده وخلاص واحد واضافت على اميلى عادى يعنى
بس انصحك مش تجيبى اسمى على لسانك
لان انا اسمى نضيف مش عايز اوسخه
فهمتى طبعا ومش هكرر الموضوع ده تانى
وخلى بقيت ولاد المنتدى ينفعوكى ياابله انتى
وكمان اى موضوع ليه فى المنتدى مش ترودى عليه

بس اقسم بالله الوقت اللى اتبعتت فيه الرساله انا كنت نايم فيه وعندى شهود بكده محمد على واسلام عمر
ووالله العظيم انا ما بعت الرساله دى ولا اعرف مين اللى بعتها ولا عرفت عنها حاجه الا بالصدفه طبعا انا عارف ان محدش هيصدقنى وكمان دودو من حقها تزعل ومن حقها مش تكلمنى تانى كمان بس والله مش انا اللى بعت الرساله دى

ولازم محمد نجاح يفتح اشتراكى ويعرف الاى بى اللى اتبعتت من الرساله ده اى بى مين
انا والله قولت الحقيقه ولو حد فيكم مصدق انى ممكن ابعت رساله بالطريقه دى يدخل يعاتبنى بس اقسم بالله انا ما بعت الرساله دى ولا اعرف عنها حاجه

لا طبعا يا منسي انا عن نفسي مصدقاك100% و مش ممكن حد باخلاقك و حبك للجميع تبعت رسالة زي دي ابدا
و الله يجازي لي كان سبب
و دودو كمان قلبها طيب و كبيير اوي و لما هتقرا الموضوع ده حتسامح اكيد
و يا رب نعرف مين لي عمل كدا عشان ده حيلخبط
المنتدى كلو ولله يا ريت يا مايسترو نعرف مين باي طريقة
ده شطان ومجسوس علينا

مش عارف اقول ايه
بجد موقف محرج جدا
الله يجازي اللى كان السبب
اكيد يامنسي انت متقولش كده لدودو او غيرها وهى عارفه كده كويس
بس الموقف صعب واكيد الغمة دي هتذول ان شاء الله

يارب بس والله العظيم انا فعلا مش عملت كده وكمان انا بنام كل يوم الساعه 2 والرساله دى اتبعتت الساعه 4 الا تلت

مصدقينك ولله ولله يا منسي مش محتاج تحلف

و حتتحل المشكلة و لا كإن حاجة حصلت ان شاء الله

السلام عليكم ورحمة الله وبركاته

اللى حصل دا مينفعش يتسكت عليه

لانه كده بيدمر العلاقات بين الناس اللى هنا

انا كنت موجود قبل ما الحكاية دى تحصل بساعتين كده

وكلمت المنسى قبل مايقفل ويروح ينام

وكلمت دودو برضو خلال الوقت ده

من حق دودو طبعا تزعل

بس لو كان دا المنسى

لكن هو اهه اقسملها انه مش هو وقريب هنعرف مين اللى عمل كده

وشكرا

بصو ياجماعه
الكلام ده حصل فعلا
انا كنت بكلم المنسى قبل الساعه 2 بشويه كمان
والمنسى قالى انا قايم انام
وبعدها بشويه دخلت دودو
واتكلمنا عادى جدا
وكانت الرساله لسه مش وصلتها
وده كان تقريبا الساعه 2 ونص
وبعدين انا قمت انام
وده كلو والرساله لسه مش وصلت دودو
يبقى مين يقدر يدخل باشتراك المنسى ويبعت الرساله دى
اللى يعمل كده لازم يكون حد عارف كلمة المرور بتاعتك يامنسى
يعنى لازم تدور كويس
مين يعرف كلمة المرور بتاعتك
لان دى مش سهله
والكلام اللى اتقال مش كويس

لاحول ولا قوة الا بالله فى ايد يتخرب فى منتدى وتوقعنا مع بعض مش عارف لغاية امتى مشاكل دى هتفضل كدة بس اكيد 100فى مية حد قريب منك يا منسى وكان زعلان معاك وبيعض معاك كتير ولمح الباسورد اصل عمرة متجى كدة صدفة يكتب بسورد وتيجى صح
واكيد دودو هتفهم وهتعرف اللى حصل وانت يا منسى طول عمرك متقول كلام زى دة لو انت زعلان مع حد ميطلعش منك كل دة وانا مصدق يا منسى 500فى مية

استحاله المنسى يعمل كدا انا مع انى لسه جديده بس متأكده ان المنسى انسان محترم جدا جدا وعمره ما يزعل حد كدا
واكيد دودو هتفهم الكلام دا وهتفهم ان فى حد بيوقع بينهم

و لا آيد بتخرب و لا أنا مستغرب

و لا متفاجئ زيكوا

ده تالت موقف أحضره ف المنتدي زي كدة

و معلش أنا مش هقدر اقول آسامي آشخاص

أنا هلمح لحاجتين حصلوا قبل كدة

الآولي الحمد لله أنا ساعات بكون مصدر ثقة

لبعض الآخوة اللي معانا ف المنتدي

و ده فضل و نعمة كبير من ربنا و شرف ليا

يارب أكون أده

ف الموقف الآولاني واحدة كانت معانا

قالتلي علي أن في رسالة جاتلها من واحد هنا

و بعديها الشخص المرسل منه الرسالة

بعتلي رسالة أن حصل موقف زي ده معاه

ناحية واحدة حلف بالله أنه عمره ما يقدر يكتبلها كدة

المهم أتضح ف النهاية علي لسانه هو

أن حد ف المكان اللي كان فاتح المنتدي منه

دخل وراه و عمل كدة و هو عارف مين اللي عمل كدة

و مصلحته أيه و أنتهي الموقف

بأني كنت شاهد علي أحداث حصلت ف موقف مشابه

الموقف التاني في شخصية معانا برضه ف المنتدي

بعتلها رسالة طويلة عريضة ردت عليا بشكل

بصراحة معجبنيش

و لآني مبحبش أداري اللي جوايا

بعت عتاب للشخصية دي ع الرد ده

جاتلي أجابة أن الرد ده مش هو اللي بعته

و ميعرفش مين بعته

سألته في حد معاه الآسم المستخدم و كلمة السر بتوعك

قالي لا بس ممكن يكون حد دخل وراه

رد بالآيقونة دي علي رسالتي

و لآني بصراحة برضه كنت زعلان

و بحب آفهم و آتعلم سألت المايسترو في رسالة

ممكن حد يشوف رسايلي غيري

قالي ف رد الرسالة

مينفعش حتي ليه هو شخصياً كصاحب للمنتدي

و قالي أزاي تبأه أسمها رسايل خاصة

و حد غيرك يشوفها و فعلاً صدقت كلامه

لصدقه و مصداقية اللي قاله علي مستوي المنتديات

إذن بناءاً علي مواقف مشابهة حصلت معايا شخصياً

مع آشخاص موجودة و شاهدة ع الآحداث اللي قلتها

اللغز كله ف مين يعرف الآسم المستخدم و كلمة مرور بتوعك

و كدة مفيش المشكلة بإذن الله

المنسي أقسم بالله لثقته ف نفسه و ف كلامه

و أنا شايف أن دودو متفهمة لصدق المنسي

و أول واحدة دافعت عنه قبل كدة بحماس أن المنسي عمره ما يغلط

حتي بالآمارة آستشهدت وقتها بآية من القرآن الكريم

ف موضوع عملته مقالب آسمه ليلة القبض علي المنسي

عموماً عشان الموقف يتحل

أصبح اللغز كله ف آيد

المايسترو أنه يتأكد مين الآي بي اللي دخل بأسم المنسي

مع أن اللي أهم عندي من الآي بي

ثقتنا ف بعض و آحترامنا المتبادل بينا

فاصل مهم قوي لآنتصارنا علي أي موقف أو مشكلة الله لا يقدر

و الحمد لله ده موجود و هيفضل موجود

دايماً بينا بإذن الله

لا حول ولا قوة الا بالله

طبعا يا منسى مصدقين انا اصلا لما قريت الكلام مصدقتش اللى حصل

وعارفين ان الكلام ده عمره ما يطلع منك ابدا

لاى حد مهما كان . ووالله واقسم بالله يا دودو انتى متعرفيش المنسى بيحترمك اد ايه

وبيعتبرك زى اخته . وعمره ما غلط فى اى حد من المنتدى او جاب سيرته بكلام مش كويس

حتى لو بينهم مشاكل . دودو متصدقيش الكلام اللى وصلك والمنسى طلع بنفسه واعتذر

عن شئ هو فعلا معملوش وانتى متاكدة انه عمره ما يعملها

عندك حق ان الكلام يصدمك . بس اتاكدى مليون فى الميه وانا بقولهالك عن ثقة انه

عمره ما يعمل كدة خالص .وربنا يعدى المشكلة دى على خير

ونعرف مين اللى عمل كدة وايه هدفه من كدة

بس والله فعلا يا جماعه مش انا ومحدش يعرف الباس وورد غيرى انا واسلام واسلام عمره ما يعملها وبعدين انا اخر واحد بنام فى البيت ومحدش بيقعد على الجهاز غيرى وغير مرات اخويا ودول ما يعرفوش حاجه عن اى حاجه بعملها ولا بدخل على ايه ولا يعرفوا المنتدى ولا حتى الباس وورد بتاعى بجد انا مش عارف ايه مين اللى عمل كده ولا عمله ازاى بس الاكيد ان محمد نجاح لازم يدخل بإشتراكى ويدخل على الرسايل بتاعتى ويشوف الاى بى

اوك ياجماعه خلاص حصل خير
بس فعلا انا كنت موجوده امبارح بس مش لمتاخر كده
انا بعد ما قفلت مع محمد على قفلت وقومت
وكمان انا مش بعت رسايل للمنسى انا بردوا فؤجت بيها
وخلاص ياجماعه حصل خير

لا محصلش خير طبعا

ازاى حد يفتح اشتراكى واشتراكك

ويبعت رسايل لينا احنا الاتنين

من غير مانعرف

دا كده بيضرب عصفورين بحجر

وييوقع بيننا ااحنا الاتنين

وبعدين هو فين محمد

هو اللى فى ايده الحل كله

انا عن نفسى هعرف باسلوبى يامنسى
بس بردوا محمد ممكن بردوا يقولنا
بس عن نفسى لازم اعرف مين دخل وعايز يوقع بينا
اولا استحاله ازعل من المنسى
لانه غالى عندى جدا مهما عملتوا مش اقدر ازعل منه

وانتى اغلى طبعا عندى يا دودو وانتى عارفه كده
شوفتوا يا جماعه حد دخل بإشتراكى انا ودودو وبعت رسايل للإشتراكين ياريت لو حصل الموضوع ده مع اى حد تانى انتبهوا الاول بس ياريت تساعدونا علشان نعرف مين اللى عمل كده

لأ بقا ده بجد حاجه تجنن فيه رساله طلعت من اشتراكى دلوقتى لدودو مكتوب فيها مش انا قولتلك مش تكلمينى تانى
كده لازم محمد نجاح يظهر علشان يوقف الكلام اللى بيحصل ده

انا اتاكدت فعشان كده قولت للمنسى
لانه بعتلى رساله وفى نفس الوقت جانى رساله تانيه بس فى نفس الوقت
بس انا كده هتجنن والله

ها يا جماعه لازم نعرف الليله دى جايه منين

انا ماعنتش فاهم اى حاجه
ايه اللى بيحصل

لاحول ولا قوة الا بالله

ايه اللخبطة دي لازم حل يا جماعة

و انا ولله حتجنن كمان
لازم نعرف مين ده

طيب مين اللى بيعمل كل ده
ونيته ايه

طبعا نيتو يلخبط بينا

ايه يا جماعة انتوا اتحسدتوا ولا ايه

ايه اللى بيحصل فى المنتدى ؟؟ ومين اللى بيعمل كدة ؟؟؟

لا بقولكم ايه لازم تدخل يا مايسترو وتشوف قبل ما المشكلة تكبر اكتر من كدة

والنهاردة دودو والمنسى

والله اعلم بكره مخبى ايه ؟!

الحل فى ايدك يا محمد عايزين نخلص من وجع الدماغ والمشاكل اللى عماله تطلع لنا

فى المنتدى .... استغفر الله العلى العظيم

ارجوك يا مايستروتشوف المشكلة دي لو بالامكان

عرفت يا مياسترو ولا اية

مش بظن

بتظنى فيا يا سوزى ماشى

انا مش بظن انو المايسترو عرف
يا رب يعرف عشان احنا زهقنا ولله
و دي مشكلة فعلا

مياسترو نام ولا اية ولا هو مش عارف بظبط

يا نهار ابيض كل ده حصل فى اليوم اللى غبته

اولا انا اسف على عدم تواجدى فى الفتره اللى فاتت دى

لان والله العظيم الجهاز والنت عندى مش عارف اعمل فيهم ايه

ثانيا انا الموضوع ده فعلا اخطر موضوع ممكن يحصل فى المنتدى ده مش يوقع بينا بس

ده يدمر المنتدى ويخلى تعبنا كله راح على الفاضى

اولا علشان اوضح حاجه بسيطه للناس لاى واحد ايجه فى باله ان ممكن اعمل حاجه زى دى
فانا والله العظيم اموت قبل متحصل حاجه زى دى منى

ثالثا المنسى بيقول اتبعت من الاكونت بتاعه رساله خاصه لدودو
المهم مين اللى باعت الرساله

اللى بعتها اكيد عارف اليوزر نيم بتاع المنسى وده سهل وكله عارفه

ولازم يكون عارف الباسورد بتاع المنسى ودى حاجه محدش يعرفه اكيد الا المنسى

المشكله بقه الخطيره اللى ممكن تحصل غير انه يوقع بينا
انه ممكن يخرب فى المنتدى
يعنى يحذف موضوعات ويمسح ردود لان المنسى الاكونت بتاعه اكونت مشرف وليه صلاحيات كتير فى المنتدى

المهم فى كل ده ان شاء الله هنعرف هوه مين

قريب جدا بس انا هكلم المنسى على الايميل واعرف منه حاجات ادق وافصل ونغير ليه الباسورد

اوكي
عدرينك يا مايسترو
بس مش المنسي لوحدو حتى دودو بيحصل ليها كدا كمان

طب و دودو يا محمد ماهى حصل نفس الموضوع

مالكم يا آسرة آحلي حياة
و النبي خلوا بالكم من كلامكم شوية
آه في مشكلة و الكل مقدر
بس معتقدش المشكلة توصل
أن دودو تقول : (( استحاله ازعل من المنسى
لانه غالى عندى جدا مهما عملتوا مش اقدر ازعل منه ))
أسمحيلي
هما مين دول يا دودو اللي انتي بتجمعي عليهم
و مين الناس الكتير دول
اللي مصلحتهم يوقعوا بينك انتي و المنسي

و بعدين المنسي هو كمان بيقول للآعضاء
أنتبهوا عشان ممكن تحصل بينكم و بين حد

أيه يا عم منسي أنت كدة بتشكك الآعضاء
ف ثقتهم بينا و ف المنتدي من غير ما تحس

و المايسترو لما رجع
بيقسم بالله أنه عمره ما يعملها
كأن حد لا سمح الله وجهله أتهام

يا مايسترو يتهيألي أنا قلت
مشاكل مقاربة لموقف دودو و المنسي
و قلت أني دورت و عرفت أن المشكلة
دايماً بتيجي منين وقلت
أني سألتك و خدت منك أجابة شافعة و قاطعة
أن مينفعش حد يطلع علي رسايل حد
و اللي أنا عرفته ووصلته من خلال المنتديات
و عالم الآنترنت هو صدق كلامك و مصداقيتك
إذن محدش وجهلك أي آتهام
و لا حد يقدر لأن كلنا عارفين مين
هو محمد نجاح

معلش بأه أنا هقول حاجة مرضتش أقولها من ساعة
ما حصلت المشكلة
اللي عمل كدة حد دخل بأسم و باسوورد المنسي
أستغل أن أنا و دودو و سوزي
بالتحديد
بنتسلي ف ألعاب المقهي و مواضيع المنتدي
و بعتلها الرسالة
ده مين أو دي مين
حد عارف كويس أسم المنسي
و الباسوورد بتاعه
و آستغل أن المنسي بيدخل ساعات مخفي
و عارف كويس قوي علاقة
كل واحد فينا بالتاني شكلها أيه
يعني مش حسبة برما

معلش يا جدعان أنا لازم أقول كدة
و مستعد أقسم عليه
إذا كان في مشكلة حصلت
ياريت متكونش علي حساب المنتدي و آعضائه
و اللي أهم من كدة ياريت متكونش علي حساب الثقة
الممنوحة للآعضاء
اللي بالمشكلة دي
خوفتوا بيها الآعضاء من تبادل الرسائل
الخاصة خوفاً من آطلاع حد غير المرسل إليه
علي الرسالة
مع أن ده مستحيل و من رابع المستحيلات
أنه يحصل

يا جماعة و علي مسئوليتي الشخصية
كلام موجه لكل الآعضاء بما فيهم نفسي

تبادل الرسائل الشخصية مع من تحب
و أتأكدوا مليون ف المية
أن محدش يقدر يشوفها غير
الراسل و المرسل إليه
حتي صاحب المنتدي أو المدير العام للمنتدي
شخصياً ميقدرش يشوف رسايلك الخاصة

الوحيد اللي يقدر يشوف رسايلك
و يستخدمها لحسابه أو لمصلحته
أي شخص سواء من المنتدي
أو من خارجه طالما معاه الباسوورد
بتاعك
و لو حد أخترق المنتدي هيخترق المنتدي
كله يعني هيبأه بيخترق اللينك
بتاع المنتدي مش رسايل الآعضاء

ياريت بأه نهدي و نحل مشاكلنا براحة
و بهدوء
عشان الآعضاء اللي عندهم
خوف أو قلق أو ثقتهم قلت فينا للآسف
ترجع زي ما كانت كآسرة واحدة للمنتدي

على فكره يا كريم انت تعتبر شوهت صورتى قدام المنتدى بس عادى مش هتفرق معايا
اللى بيحصل يا كريم ان حد دخل بإشتراكى وبإشتراك دودو فى نفس الوقت وتبادل الرسايل وبعت امبارح رساله من اشتراك دودو لمحمد على يعنى اللى بيعمل كده لا نعرفه ولا يعرفنا ولا له علاقه بينا اصلا ومش عارفين هدفه ايه

ايه ياكريم الكلام اللى بتقوله ده

الكلام دا فى غلط كتير معلش

اولها انت بتقول من خلال كلامك ان المنسى ودود بيشككوا الناس فى المنتدى

وبتعمل ايحاء لحاجات غريبه تانيه

خليك انت مكانهم

لما تلاقى حد دخل من على اكاونت كل واحد فيهم

وبعت رسايل بيشتم فيها التانى

يبقى هو او هى عاوزهم يعملوا ايه؟

وكلمة دودو مهما عملتوا مش اقدر ازعل منه

دى بتقوللها اللى بيحاول يعمل كده

مش لناس محدده واللى يفتكر كده على نفسه

يبقى بيطبق المثل الل على راسه بطحه

(أستغل أن أنا و دودو و سوزي)

الكلام دا ملوش معنى يا كريم

اقسملك بالله انى متابع المشكله من اولها

والكلام كله على يدى

ومحدش جاب سيرتك او سيرة حد فى المنتدى كله انه يكون له دخل فى الموضوع

وفى حاجه انت غلطت فيها

ان لو فى حد عمل هاكر على المنتدى

يمكن يعرف الياسورد بتاع الادمين

ومن خلاله يعرف الباسورد بتاعة اى عضو هنا

ويدخل يلعب فى الرسايل

وممكن يقفل المنتدى كله

ويخرب حاجات كتير

يا كريم المنسى ودودو محتارين ومش عارفين يعملوا ايه

كده كل سرارهم مكشوفه وممكن يتغير الباس وميعرفوش يدخلوا

ومممكن وممكن وممكن حاجات كتير تانى

فا اعذرهم لو طلعت كلمه غلط

بس والله ماحد يقصد يجيب سيرة حد هنا

يا منسي فين صورتك اللي أنا شوهتها دي

و هشوهها ليه

في ايه بيني و بينك عشان أشوهها لا سمح الله

أنا كل كلمة قلتها ف المشكلة دي

بدافع عن أطرافها لأنهم يهموني جداً جداً جداً

و لله الحمد أنا من أول لحظة لآشتراكي ف المنتدي

و أنا عمري ما طلعت العيبة من بقي لأي حد

من آصغر واحد ف المنتدي لآكبره

كله عندي بتعامل معاه علي أنه ف مقام أعلي مني

و بعامله بمعاملة آحسن من معاملته ليا

و معتبر هنا أن الكل أهلي و أصحابي و آخواتي

من آحدث عضو لآقدم عضو

يعني مش كون اني بقول رآيي ف مشكلة آطرافها يهموني

أني بشوه ف صورة حد و لا بقلل من حد لا سمح الله

ده عمره ما كان و لا هيكون مبدأي و لا آسلوبي

و لا شخصيتي و أظن الكل عارف كدة كويس

و اللي ميعرفنيش يقرا كل كلامي و هو يصدق

و يعرفني كويس

ده مش دفاع عن نفسي يا منسي

لأني مش متهم أن أنا بس بصحح كلمة قلتها

و زعلتني منك

أنا اللي بني و بينك ربنا

هو اللي شاهد علي أن كلامي كله

مشككتش في و لا ف حد و لا لا سمح الله

شوهت صورة حد

أنا يا منسي و ربنا يشهد أني بتعامل هنا

للمرة المليون بقولها مع ناس بعتبرهم آخواتي

زي ما بعتبرك آخ و صاحب

و اللي يشوه صورة حد أو يقلل من حد

ده مش أنا ده شخص مريض و حاقد

و العياذ بالله

ياعم كريم انا عارف انك لا عيبت فيا ولا تقصد بس انا قولتلك ان كده ممكن ناس تفهمنى انا غلط لأن والله انا ودودو حد دخل بإشتراكنا احنا الاتنين وبعت رسايل لينا وفوجئنا ان الرسايل دى على اشتراكنا ومقريه بنفتحها بالصدفه لاقينا الكلام ده بسالها قالتلى انا مش بعتلك حاجه وانا كمان مش بعتلها حاجه بس الرسايل دى موجوده على اشتراكاتنا وميعاد ارسالها كان قبل الفجر بتلت ساعه وده معاد انا نايم فيه وكمان دودو مش بتكون موجوده

إسـ،ـلام عـ،مـ،ـر كتب:: ايه ياكريم الكلام اللى بتقوله ده

الكلام دا فى غلط كتير معلش
و أيه الغلط اللي ف كلامي لا سمح الله يا آسلام

اولها انت بتقول من خلال كلامك ان المنسى ودود بيشككوا الناس فى المنتدى
أنا مقلتش كدة
أنا قلت أن فتح المشكلة دي علي الملآ
و كتر الكلام فيها
مش كويس و هيقلل من ثقة الآعضاء
علي رسايلهم و علي خصوصياتهم
و ده هيقللهم من أننا ككل كآشخاص و كمنتدي قبل الآشخاص

وبتعمل ايحاء لحاجات غريبه تانيه
إيحاءات غريبة
و أيه هي الآيحاءات دي كمان
مقلتهاش ليه يا آسلام
و لا هي آتهامات و قذف المحصنين
بالباطل و خلاص

خليك انت مكانهم
و الله العظيم و ما في حد لي عليا حلفان
و الله العظيم كمان مرة
أنا واخد المشكلة دي كأن أنا اللي فيها
لأن بعتبر أن أن ودودو واحد
و أنا و المنسي واحد
و أنا و آي أخ أو آخت برضه واحد

لما تلاقى حد دخل من على اكاونت كل واحد فيهم

وبعت رسايل بيشتم فيها التانى

يبقى هو او هى عاوزهم يعملوا ايه؟

وكلمة دودو مهما عملتوا مش اقدر ازعل منه

دى بتقوللها اللى بيحاول يعمل كده
هي قلتلك أن معناها كدة
و لا أنت بتخمن
أنا قصدت أنها ليه جمعت علي جماعة مش فرد
و بسألها مين هما اللي مصلحتهم
يعملوا كدة بينك و بين المنسي طالما هما كتير

مش لناس محدده واللى يفتكر كده على نفسه
ما أنا بسألها هما مين
بدل ما المنتدي ما هو مقلوب و كله شاكك و قلقان

يبقى بيطبق المثل الل على راسه بطحه
لا ياعم انا الحمد لله مش م اللي راسهم
عليها نقر حتي يا عم آسلام
أنا كنت بهاجم دودو انها لسه معرفتش مين
اللي عمل كدة و بتوجه رسالة لناس كتير
و اللي علي راسه بطحة ده شخص مجرم مريض
حسبي الله و نعم الوكيل فيه
أياً كان هو مين
و آظن عيب أنك تتهمني الآتهام يا آسلام بالباطل

(أستغل أن أنا و دودو و سوزي)

الكلام دا ملوش معنى يا كريم
ليه معني لأنه جزء من نص الرسالة
و أنت كده عملت زي اللي خد
جزء من آية قرآنية
يا أيها الناس لا تقربوا الصلاة
قال فرحت خلاص ما آصليش
و مخدش باله أنه ربنا ختم الآية ب و أنتم سكاري

لو أنت قاصد خير مش بتهاجمني
و معرفش ليه يا آسلام
كنت كملت كلامي
أنه أستغل وجودي انا و دودو و سوزي
و أستغل أن المنسي ساعات بيظهر مخفي
و دخل و عمل جريمته السودة دي
زي ما الكلام ده قاله المنسي
ف أول كلامه
يعني ليه علاقة بالكلام

اقسملك بالله انى متابع المشكله من اولها

والكلام كله على يدى

ومحدش جاب سيرتك او سيرة حد فى المنتدى كله انه يكون له دخل فى الموضوع
و محدش يقدر يجيب سيرتي يا آسلام
و لا ف المشكلة دي و لا غيرها و لله الحمد
دي مش فتحة صدر
لا دي ثقة و آحترام فرضته شخصيتي
علي علاقتي بالناس اللي هنا
يعني لأني مقدرش أغلط ف حد هنا
الحمد لله مبغلطش

وفى حاجه انت غلطت فيها
أنت خلتني غلطان ف كذا حاجة
و ربنا يشهد أني زي ما قلت
علي نفسي مقدرش أغلط ف أصغر شخص هنا
و الحمد لله الكل هنا كبير مقام
و كله عارف علاقتي بيه

ان لو فى حد عمل هاكر على المنتدى

يمكن يعرف الياسورد بتاع الادمين

ومن خلاله يعرف الباسورد بتاعة اى عضو هنا

ويدخل يلعب فى الرسايل

وممكن يقفل المنتدى كله

ويخرب حاجات كتير

معتقدش كل ده هيحصل
من غير محمد نجاح ياخد باله
و لو حد هكر المنتدي زي ما بتقول معلوماتك
ايه مصلحته أنه يوقع بين دودو و المنسي

يا كريم المنسى ودودو محتارين ومش عارفين يعملوا ايه
و الله و أنا زيهم و ربك عالم

كده كل سرارهم مكشوفه وممكن يتغير الباس وميعرفوش يدخلوا

ومممكن وممكن وممكن حاجات كتير تانى

فا اعذرهم لو طلعت كلمه غلط
أنا عذرهم و حاطط نفس مكانهم
بس أسمحلي
أعذرك أنت أزاي بعد الغلط ده كله

بس والله ماحد يقصد يجيب سيرة حد هنا
و أنا كل كلامي كان قريب من كدة
و مقصدتش غير أن ألحق القلق اللي عملته المشكلة دي
و ألحق ثقة الآعضاء و أنا واحد منهم
ف أنهم ما يخلوش المشكلة دي
تآثر علي ثقتهم في المنتدي ككل
عشان تعبك و تعب أي حد تعب ف المنتدي
ميضيعش هدر بسبب
مشكلة المتهم كدة فيها
شخص مريض
حسبي الله و نعم الوكيل فيه

و كتر خيرك يا آسلام علي آي كلام أنت قلته
و آتهام وجتهولي
الله يسامحك عليهم بس بجد
أنا كدة هتخليني أعيد حساباتي مرة تانية
ف كل حاجة تخصني ف المنتدي و براه
و دي حاجة بشكرك أنك فوقتني ليها و نبهتني ليها
كتر خيرك يا آسلام ؛ خيرك كتر أوي عليا

يا جماعه اولا مش هنقدر نعرف للاسف هوه مين او هيه مين

لانه الرسايل الخاصه ملهاش ايبيه لكاتب الرساله غير الردود والمواضيع

ثانيا هنغير الباسورد بتاع المنسى ودودو

وهنشوف ايه اللى هيحصل بعد كده

اللى عمل المشكله دى كده انبسط واطمن ان الهدف اللى كان عاوزه اتحقق

اه ولله يا منسي ده و صل ليلي عايزو

EL_MAYSTRO كتب:: يا جماعه اولا مش هنقدر نعرف للاسف هوه مين او هيه مين

لانه الرسايل الخاصه ملهاش ايبيه لكاتب الرساله غير الردود والمواضيع

ثانيا هنغير الباسورد بتاع المنسى ودودو

وهنشوف ايه اللى هيحصل بعد كده

بص يا مايسترو أنا معاك ف كل كلامك
وواثق منه و الله ثقة عمياء
بس كدة في شخص مريض وحاقد
و أنسان غير سوي و قلبه آسود
عمل مشكلة كبيرة بين أطراف مهمة ف المنتدي
و أنا كمان رجلي جت معاهم ف كلام مش وقته
دلوقتي نتكلم فيه
لآني و لله الحمد مش محتاج ادافع عن نفسي

المهم و ده طلب بأه منك بس ده تنفيذه
بأه جبري و حتمي و ضروري
و لا زم يحصل
ده كحل مش كفرض رآيي عليك لا سمح الله
أنك تستعرض كل الآيبيهات اللي دخلت ف مشاركات
المنسي و الآي بي الغريب عن ألآي بيهات اللي بيخش بيهم
يبأه هو ده الجاني اللي بندور عليه
و يتهيألي دي سهلة يا مايسترو أن شاء الله

مفيش ايبيه غريب دخل يا كريم
وعلشان كده معرفتش هوه مين

واهى ازمة وهتعدى ... واهى ازمة وهتعدى
وفى وسط الصراعات دى
مين ميحبش فاطمة
واهى ازمة وهتعدى ... واهى ازمة وهتعدى

عارفين بتفكرونى بموبايلى القديم
لما كان بيبعت رسايل لوحده
بس الحمد لله كان بيبعتها فاضية
اخطر مشكله حصلت فى المنتدى 165851

يا جماعه المشكله ان ده واحد دخل بإشتراكى وبعت رسايل لدودو ودخل بإشتراك دودو وبعت رسايل ليا يعنى واحد عرف الباس وورد بتاعى انا ودودو

كريم الجمال كتب:

إسـ،ـلام عـ،مـ،ـر كتب:: و كتر خيرك يا آسلام علي آي كلام أنت قلته
و آتهام وجتهولي
الله يسامحك عليهم بس بجد
أنا كدة هتخليني أعيد حساباتي مرة تانية
ف كل حاجة تخصني ف المنتدي و براه
و دي حاجة بشكرك أنك فوقتني ليها و نبهتني ليها
كتر خيرك يا آسلام ؛ خيرك كتر أوي عليا

شوفت بقى ؟

لما انا اتكلمت بالطريقه دى انت زعلت منى

ولما انت اتكلمت بيها مش عاوز الناس تزعل؟

اولا دودو والمنسى زعلوا منك

لانك فى كلامك كان فيه تلميحات كتير

ارجوك ياكريم متزعلش منى او من اى حد هنا

لاننا كلنا فى وسط المشكله دى ياما نعدى منها بسلام ياما هنبقى زى اللى بيحصل دا طول عمرنا

وهنفضل نتخانق مع بعض على طول

انا مش محتاج اوضحلك انا بحترمك اد ايه

لانك اكيد عارف

ولو مش عارف يبقى ليك الحق انك تعمل اللى انت عاوز تعمله

يا جماعه انتو كدا وصلتوه للى هو عايزه فعلا

اللى عمل كدة موقعش بين دودو ومنسىلكن وقع بين المنتدى لازم نوضع حل

يا جماعة
الموضوع خلاص قرب يتحل الحمد لله وقربنا نوصل للى اتسبب فى كل ده
وكل حاجة هتبان قريب اوى ان شاء الله
ولو سمحتوا متتكلموش فى الموضوع ده تانى
ومتردوش على بعض عشان الكلام ميفلتش منكم
وتطلعلنا مشكلة جديدة
وكل حاجة هتبان وهتعرفوها قريب اوى بأذن الله

ودلوقتى عايزكم تغنوا معايا

واهى ازمة وهتعدى ... واهى ازمة وهتعدى
وفى وسط الصراعات دى
مين بيحبش فاطمة
واهى ازمة وهتعدى .... واهى ازمة وهتعدى

يلا غنوا معايا
مش سامع صوتكم
اخطر مشكله حصلت فى المنتدى 165851

» اخطر طريق فى العالم
» هذا الموضوع لمن لديه مشكله عاطفيه ويريد حلها حل من القلب للقلب
» الي يوصل ل5 ملك المنتدى والي يوصل ل10 يرمي ملك المنتدى من فوق الجبل
» وفاة احد أعضــــــــــــــاء المنتدى
» الى كل اعضاء المنتدى