موضوع خاص منى للمنسى ....!!

السلام عليكم ورحمة الله وبركاته

صباحك او مساك فل يا عم المنسى ( حسب التوقيت اللى قريت فيه الموضوع يعنى )

ايه يا عم مالك مخنوق وزهقان من حياتك ليه ؟وعمال تكتب فى مواضيع حزينة وتخلينا نعيط , هى الدنيا ياعم فيها يستاهل تزعل علشانه كلنا هنموت سواء اجلا او عاجلا ومش هناخد منها حاجة فى الاخر غير عملنا الصالح اللى حاولنا نقرب بيه من ربنا هى دى الحاجة الوحيدة اللى تستحق تزعل علشانها لو مقدرتش عليها .
انت اكيد عارف بيت الشعر الى بيقول :
" نعيب زماننا والعيب فينا ....... وما لزماننا عيب سوانا "
دايما لما تكون الدنيا ماشية معانا مش زى ما احنا عايزين نفضل نلعن فى الدنيا نقول حظانا وحش وملانش حظ خالص مع ان فى الغالب بيكون العيب فينا احنا من جوانا وكل حاجة بتحصلنا بسبب اللى بنعمله شوف بص جواك الاول يا منسى وشوف ايه العيب فيك واللى بتعمله ممكن يكون سبب اللى بيحصلك ده بص الاول وشوف اذا كنت مادى حق ربنا عليك وبتصلى فروضه وبتحاول تقرب منه ولا لا ؟اهم حاجة علشان تكون سعيد فى دنيتك ان ربنا يكون راضى عنك .
وصدقنى والله يا منسى كل واحد بيعيش حياته زى ما هو عايز مهما كانت صعبة او بتاعنده المهم انك تعرف ازاى تطوع حياتك للى انت عايزه الللى عايز يعيش فرحان وسعيد هيعيش كده واللى عايز يحسس نفسه دايما انه ملوش حظ فى الدنيا دى وانها دايما تعانده هيفضل دايما عايش حياته فى حزن ويلوم فى كل اللى حواليه ومش هيوصل لنتيجة فى الاخر مع انه لو فكر يغير نفسه وحياته هيبقى افضل بكتير .
الرسول صلى الله عليه وسلم قال :"اذا نظر احدكم الى من فضل عليه فى المال والخلق فلينظر الى من هو اسفل منه "
واللى اقصده هنا وخلانى الحديث فكرته مش حكاية الفلوس او حاجة الواحد علشان يرتاح ويحس انه حظه حلو فى الدنيا بيحتاج يشوف ناس اقل منه ناس يحس انه افضل منهم وربنا كده كرمه وان حياته مهما كانت صعبة فى ناس عايشة حياة اصعب منها واهم حاجة ان كل واحد يقتنع بللى ربنا قسمهوله ويحمده دايما على كل حاجة الحلوة والوحشة وربنا هيكرمه دايما " لئن شكرتم لازيدنكم" .
وانا من صغرى والله يا منسى والواحد مرت عليه مواقف ومشاكل ولف مشاوير وراح وجه وحاجات كتير مابين مرض ووفاة ناس غالية عليا وغيرها ومع ذلك عايش حياتى عادى خالص ومبسوط ومش بسمح لاى حاجة تحصلى ان تعكر عليا حياتى لو انها تهزمنى خلى عندك ارادة وواجه الدنيا بابتسامة دايما وتفاؤل وان شاء الله ربنا هيكرمك
اضحك للدنيا تضحكلك
وفكك يا منسى من الدنيا متشيلش هم اى حاجة خلى همك الاكبر اخرتك وانك ترضى ربنا عنك وخليك دايما مقتنع " ان الله اذا احب عبدا ابتلاه " فاصبر على اللى بيحصل
وربنا ان شاء الله " ما ابكاك الا ليضحكك " وده اللى بتمناه ليك
وبتمنى ان ربنا يوفقك فى كل حاجة فى حياتك انت وكل الناس اللى فى المنتدى اللى ربنا يعلم غاليين عليا اد ايه
وانت انسان طيب وطموح وشاب مصر تفتخر بيك متخليش اى حد او اى حاجة تقلل من همتك او تخخليك تياس وتوكل دايما على ربنا
وان شاء الله ربنا يوفقك

وبعتذر عن الاطالة واتمنى يكون كلامى مفيد وتكون رسالتى وصلت


تحياتى
الامير المصرى ...............

يا منسى يا عسل
انا مش بتكلم عالمواضيع اللى بتنزلها دى هى جميلة وعادى يعنى خخالص مش شرط تكون المواضيع بتعبر عن نفسية اللى بينزلها
انت دايما بتقولنا ان الحظ معاندك ودايما مخنوق ويائس من حياتك
وانك معندكش امل فى اى حاجة
وكتبت الموضوع ده كده علشان حبيت اساعد بس واقول كلمة كويسة وانصح حد بحبه وغالى علي وكنت عايز اقولك اللى عندى يمكن كلامى يساعد مش اكتر
والدنيا صدقنى والله مش حظ وبس
وربنا يوفقك كمان مرة